दशैंको शुभसाइत कुन देशमा कुन समयमा ?

टीका लगाउँदा दिने आशीष यस्तो छ :-

आयुर्द्रोणसुते श्रियो दशरथे शत्रुक्षयं राघवे।

ऐश्वर्यं नहुषे गतिश्च पवने मानञ्च दुर्योधने।

दानं सूर्यसुते बलं हलधरे सत्यञ्च कुन्तीसुते।

विज्ञानं विदुरे भवतु भवतां कीर्तिश्च नारायणे॥

शुभसाइतमा टीका लगाउन जम्मा भएकामध्ये कसले पहिले टीका लगाउने र थाप्ने भन्ने प्रश्न उठ्नसक्छ । सबैलाई आफुले शुभसाइतको टीका थाप्ने चाहना हुन सक्छ, तर त्यसो होइन तपाईं जहाँ हुनुहुन्छ, त्यहाँ भेला हुनुभएका नातेदारमध्ये सबैभन्दा ज्येष्ठ र मान्य व्यक्तित्वले टीका लगाइदिने हो र त्यहाँ उपस्थित आफ्ना कुलपरम्परा र रीतिबमोजिमको ज्येष्ठ सदस्यलाई शुभसाइतमा टीका लगाइदिनु नै शुभसाइत हो । अन्य कनिष्ठ जनका लागि पनि त्यही साइत लागु भएको मानिन्छ । एक पटक टीका थापे पछि त्यसपछि सबै शुभै शुभ हुन्छ । स्थानअनुसार टीका लगाइदिने व्यक्ति दक्षिणाभिमुख भई (दक्षिणतर्फ फर्की अर्थात् सम्मुख चन्द्रमा बनाई) तथा टीका थाप्ने व्यक्तिले पूर्वाभिमुख भई (पूर्व फर्की) अथवा दाहिने चन्द्रमा पारी टीका लगाउनु पर्दछ ।

अन्तर्राष्ट्रिय पञ्चाङ्ग निर्णय समितिले बडा दशैंको टीकाको साइत सार्वजनिक गरेको छ । सार्वजनिक तालिका अनुसार विभिन्न मुलुकमा रहेका नेपालीहरुका लागि टिकाको साइतको समय फरक फरक रहेको छ ।  

अन्तर्राष्ट्रिय समितिले गरेको पछिल्लो निर्णयअनुसार न्यूजिल्याण्डमा ८ तारेख (असोज २१ गते) बिहान ९:११ बजे, साउदी अरेबियामा सोही दिन बिहान ९:३५ बजे, हङकङमा सोही दिन १०:१ बजे, सिंगापुरमा १०:२१ बजे, इजरायलमा १०:४५ बजे, दक्षिण कोरियामा १०:४१ बजे, थाइल्याण्डमा ९:४५ बजे, कतारमा १०:१६ बजे, अबुधावीमा १०:१ बजे , मलेसियामा १०:२१ बजे र पोर्चुगलमा ९:११ बजेको समय निर्धारण गरिएको छ ।  

यसअघि पञ्चाङ्ग निर्णायक समितिले काठमाडौंमा सन् २०१९ को अक्टोबर ८ (असोज २१ गते) बिहान १०:३५ बजे टीकाको साइत भएको सार्वजनिक गरिसकेको छ ।