नवरात्रीमा कस्ती कन्याको पूजा गरेमा केकस्तो फल पाइन्छ ? (नवकन्या पूजन पद्धति) Nava Kanya Pujan Bidhi
पहिलो दिन : नौरथाको पहिलो दिन दुई वर्षकी कन्याको पूजा गर्नुपर्छ । दुई वर्षकी कन्यालाई कुमारी मानिएको छ यस्ती कन्याको पूजा गर्नाले दुःख र दरिद्रता हट्तछ, शत्रु नाश हुन्छन्, धनधान्य, आयु र बल वृद्धि हुने शास्त्रीय मान्यता छ ।
दोस्रो दिन : नौरथाको दोस्रो दिन अर्थात् द्वितीयाका दिन तीन वर्षकी कन्याको पूजा गरिन्छ । तीन वर्षकी कन्यालाई त्रिमूर्ति स्वरूपा भगवतीको रूप मानिएको छ । यस्ती कन्याको पूजा गर्नाले धनसम्पत्ति, सन्तान एवं बुद्धि प्राप्त हुन्छ ।
तेस्रो दिन : तेस्रो दिन अर्थात् तृतीया तिथिका दिन चार वर्षकी कन्याको पूजन गर्नु पर्दछ । यस्ती कन्याको कुमारीको स्वरूप मानिएको छ । यिनको पूजा गर्नाले आँटेको काममा विजय हुन्छ एवं मनोकामना पूर्ण हुन्छ ।
चौथो दिन : चौथो दिन अर्थात् चतुर्थीका दिन पाँच वर्षकी कन्याको पूजा गरिन्छ । यी कन्यालाई रोहिणी स्वरूपा भगवतीको रूपमा पूजा गर्ने चलन छ । यिनको पूजा गर्नाले रोग नाश भई आरोग्यता प्राप्त हुन्छ भन्ने शास्त्रीय मान्यता रहेको छ ।
पाँचौ दिन : नवरथाको पाँचौं दिन अर्थात् पञ्चमीका दिन कालरात्री स्वरूप मानेर छ वर्षकी कन्याको पूजा गरिन्छ । यिनको पूजन गर्नाले शत्रु नाश तथा शत्रु भय नाश हुने विश्वास गरिन्छ ।
छैटौं दिन : नौरथाको छैटौं दिन सात वर्षकी कन्यालाई चण्डिकाको रूप मानेर पूजा गर्ने चलन रहेको छ । विशेष गरी चण्डिकाको साधना धनधान्य, सम्पत्ति एवं ऐश्वर्य प्राप्तिका लागि गरिन्छ ।
सातौं दिन : सातौं दिन आठ वर्षकी कन्यालाई शाम्भवी स्वरूपा भगवतीको प्रतीक मानेर पूजा गर्ने चलन छ । शाम्भवीको पूजा गर्नाले आर्थिक पक्षका समस्या हल हुन्छन्, अनि मुद्दामामिला र वादविवादमा पनि विजय हुन्छ भन्ने विश्वास गरिन्छ ।
आठौं दिन : नौरथाको आठौं दिन पूजा गरिने नौ वर्षिया बालिकालाई माता दुर्गाको स्वरूप मानिन्छ । दुर्गा साधनाबाट कठिन कार्यमा पनि सफलता मिल्छ, शत्रु नाश हुन्छन् र मोक्ष प्राप्ति हुन्छ ।
नवौं दिन : नवौं दिन दश वर्षकी कन्यालाई सुभद्राको रूपमा पूजा गर्नुपर्छ । यसो गर्नाले सम्पूर्ण मनोकामना पूर्ण हुन्छन् भनिएको छ ।
No comments:
Post a Comment